Робототехникаға қызыққан жас-жеткіншектерге жол-бағдар болу – мен үшін мәртебе!
-Өзіңіз туралы айтып кетсеңіз, Әділбек:
-Аты-жөнім Бердиходжаев Әділбек Сайлауұлы. Қарағанды қаласы М.Жұмабаев атындағы №39 гимназияда 2013 жылдың қыркүйек айынан бастап инженер-системотехник қызметінде еңбек етіп келе жатырмын. Ал 2015 жылдан бастап мектеп оқушыларына «Робототехника» курсын жүргізіп келемін.
2014 жылы Қарағанды облысының оқу-әдістемелік орталығында мұғалімдер тренері деген сертификатқа ие болдым. 2018 жылдан бері «Kazdidac» ассоциациясында Эксперт болып істеймін, республика бойынша мемлекеттік сатып алуда STEM, робототехника кабинеттерінің техникалық талаптарға сай немесе сай еместігін тексеремін.
2018 жылдың қыркүйек айында Дания мемлекетінде «LEGO Education Academy» ұйымдастырған тренерлерді даярлау курсын сәтті өтіп, халықаралық тренер дипломын алдым.
-Қатысқан жарыстарыңызды атап өтсеңіз:
-2017 жылы халықаралық Kazrobotics-2017 жобалар байқауында Асетов Шахназар және Ақыжанов Әділжан Қарағанды қаласында өткен өңірлік іріктеуден І орынмен, Ақтөбедегі ақтық кезеңге жолдама алып, Қарағанды облысы үшін Гран-при алуға өз үлестерімді қостым.
«Kazrobotics-2018» халықаралық робототехника фестивалінде №39 мектеп оқушыларымен «Sumo39» деген топпен «Интеллектуальное сумо» жарыс категориясында Жартыбаев Жалғас пен Мукажанов Санжар деген оқушылармен І орынды еншімізге байладық. Және де жалпы командалық есеппен Гран-приді иелендік.
Өңірлік іріктеу кезеңінен І орын иеленіп, ақтық кезеңде Өзбекстан, Қырғызстан, Ресей, Қазақстанның түкпір-түкпірінен келген оқушы және студенттермен бәсекеде үздік атандық.
2019 жылы «V халықаралық Roboland-2018» фестивалінде Әсет Нұрасыл және Жұмабай Ислан «Зияткерлік сумо» (Интеллектуальное сумо) категориясында Өзбекстан, Ресей, Италия қатысқан топта І орын иеленіп, топтан шығып, кубок иелендік.
Ал 2020 жылы Красноярскте өткен «Бүкілресейлік робототехника чемпионатында» оқушыларымызбен «FLL Junior» категориясында үздік команда атанып жеңіске жеттік.
-STEM дегеніміз не, қалай түсіндіріп бере аласыз?
-Қазіргі кезде цифрлық технологияның жедел дамуы мен адам қызметінің барлық саласын цифрландырудың жылдам дамуымен байланысты STEM білім беру маңызды және өзекті мәселе, білім беру жүйесінің барлық деңгейлерінде ерекше назар аударуды талап етеді. STEM – оқытудың біріктірілген тәсілі, оның шеңберінде академиялық ғылыми-техникалық тұжырымдамалар шынайы өмір контексінде зерттеледі. Бұндай тәсілдің мақсаты – мектеп, қоғам, жұмыс және бүкіл әлем арасында STEM - сауаттылықты дамытуға және әлемдік экономикадағы бәсекеге қабілеттілікке ықпал ететін нық байланыстарды орнату. Қазір бұл түсініктің жаңа нұсқалары пайда болды, солардың ішінде анағұрлым кең таралғаны STEAM (ғылым, технологиялар, инженерия, өнер және математика).
Бүгінде көптеген елдерде, STEM-білім беру тұжырымдамасы түрлі білім беру бағдарламаларын жүзеге асырылуда.
-Мектеп оқушыларымен Сізге жұмыс істеген ұнайды ма?
-Әрине, оқушылардың қызығушылықтарын арттырып, оларды болашақ мамандықтарына даярлау, бағыт-бағдар беру мен үшін өте қызықты. Олармен жұмыс істеу барысында мен де педагог ретінде өз-өзімді шыңдап, шеберлігімді дамыта түсемін. Балалармен жұмыс істеу маған ләззат береді. Олардың жетістігін көру – мен үшін үлкен баға жетпес мәртебе.
-Рақмет сұхбатыңызға! Енді біздің жобаға қандай тілегіңіз бар?
-«Білім Керуені» жобасына СТЕМ бағытында педагогтардың кәсіби шеберліктерін дамытып, педагогикалық білімін арттырып, халықаралық деңгейде жұмыс атқарып жатқан түрлі эксперттердің тәжірибесімен бөлісіп, қазақстандық ұстаздарды бір арнаға біріктірер үлкен Ордаға айналуға тілектеспін!
Сіздерге іске сәт!