«Білім керуені» жобасының «STEM туралы үздік эссе» байқауының жеңімпаздарымен интервью айдары, қонағымыз - Сәуле Мәуленқұл
-Өзіңізді таныстырып кетсеңіз:
-Менің аты-жөнім Сәуле Мәуленқұл. Қазіргі таңда Назарбаев Университетінің механикалық инженерия мамандығының 4 – курс студентімін.
-Сіздің қандай қызығушылықтарыңыз бар?
-Мен мектеп қабырғасынан психология саласына қызыға бастадым. Сондықтан психологиялық кітаптарды оқуды ұнатамын. Сонымен қатар таза ауада отбасыммен бірге бадминтон ойнағанды жақсы көремін.
-Болашақ мамандығыңыз бойынша қандай тағы да ізденістерді қолға алып жатырсыз?
-Қазіргі алып жатқан білімім жалпы механиканың принциптерін қамтиды. Сол себепті, болашақта механиканың автоматизация және мехатроника бағытына фокус жасаймын. Университет қабырғасында экзоскелет құрастыруға қатысты зерттеу жұмысын жасап жатырмын.
-Өзіңіздің қандай арманыңыз бар? Бізбен бөліссеңіз.
-Болашақта қоғамға пайда алып келетін іспен айналысқым келеді. Нақтырақ айтатын болсам, белгілі бір ауруға байланысты қозғалысы шектелген жандарға арнап, экзоскелет жасайтын заманауи кәсіпорын ашуды армандаймын.
-Өзіңізді осы байқауға қатысқанда, педагогог рөлінде болғанда, қандай сезімге бөлендіңіз? Қандай жаңалыққа тап болдыңыз? Өзіңізге қандай ойлар келді? Не түйдіңіз?
-Педагогог рөлінде білім саласының қаншалықты үлкен өзгерістерді қажет ететінің түсіндім. Болашақ саналы ұрпақты тәрбиелеу білім саласының сапасының жоғары болуын талап етеді. Осыған орай STEM әдістемесі білім беру жүйесіне түбегейлі өзгеріс алып келеді деген сенім жоғары.
-Педагог болу Сіз үшін қалай боп көрінді? Қандай сезімді бастан кештіңіз?
-Салауатты Қазақстанды қалыптастыру мектеп саласында үлкен реформаларды қажет етеді. Сондықтан педагогог ретінде осындай өзгерістер алдында үлкен жауапкершілік сезіндім.
-Егер педагог болатын болсаңыз, қандай әдістемелік шеберліктерді ұсынар едіңіз?
-Өз эссемде жазғандай, сыни ойлайтын, логикалық қабілеті жоғары және топтық жұмысты атқара алатын оқушыларды оқыту үшін STEM жүйесіне негізделген әдістемені ұсынар едім.
-Қазіргі таңда білім беру жүйесінде қандай жаңалық енгізуші едіңіз?
-Білім беру жүйесі ел экономикасының негізгі өзегі. Сондықтан бұл сұраққа өте үлкен жауапкершілікпен қарау керек. Бәсекеге қабілетті болу үшін әлемдік деңгейдегі бағалау жүйесін енгізіп, жоғарғы санаттағы ұстаздардың санын арттыру керек деп ойлаймын.
-Заман талабына сай педагог қандай болу керек?
-Менің ойымша, педагог оқушылармен тез тіл табысатын, заманауи цифрлық технологияларды меңгерген және жаһандық көзқарасы бар тұлға болуы қажет.
-Өзіңіздің жазған эссеңіз бойынша қысқаша қорытынды жазып берсеңіз...
-STEM мектеп болашағының жарқын болуына зор үлес қосады. STEM оқушылардың креативті, сыни тұрғыда ойлануға және де шын өмір контекстінде жұмыс жасауға үйретеді. Робототехника мен инженерлік қабілетті нығайтатын жобаларды сәтті орындап, кішкентай кезінен оқушылар топтық жұмысқа үйрене алады. Мектеп жобалары өз қоғамының тіпті әлем алдындағы мәселелерді хабардар болуға және өз үлесін қосуға ынталандырады. Сонымен қатар, мектеп қабырғасынан бастап үлкен тәжірибе алып, болашақ мамандығын саралап саналы түрде таңдауға икемделеді. Осылайша, STEM білім жүйесі келешек инноваторлар мен инженер мамандарды, комплексті ойлай алатын бәсекеге қабілетті жастардың өсіп шығуына кепіл береді.
-Егер де келесі рет осындай байқауларға қатысып жатсаңыз, басқа конкурсанттарға қандай ақыл-кеңес берер едіңіз?
-Ең алдымен әр қатысушы өз күшіне толықтай сенуі қажет. Сонымен қатар өз жұмысына сыни тұрғыда қарап, көзқарасын барынша ашық жеткізуге тырысу керек. Эссе тақырыбына қатысты ауқымды зерттеу жұмыстарын жасаған дұрыс.
-Аталмыш жобаның келешек өміріне қандай ұсыныстар жасап, кеңес бере аласыз? Мүмкін жақсы идеяларыңыз бар шығар?
-Осындай байқауларды тек қана эссе түрінде емес, сонымен қатар ауызша конференция ретінде өткізген дұрыс деп ойлаймын. Бұл студенттер арасында құнды идеялармен алмасуға мүмкіндік береді. Мектеп оқушылары арасында инженерия салысына қатысты 3D модель құрастыру сайыстарын ұйымдастыруға болады.
-«Білім кереуені» жобасына өз жаныңыздан қандай тілек айта аласыз?
-«Білім кереуені» жобасын ұйымдастырған жандарға үлкен алғыс айтамын. Жобаларыңыз ары қарай өркендеп дами берсін! Сіздер жасаған әрбір іс-шара еліміздің білім-беру жүйесіне жаңа өзгерістер алып келсін.
Алда тек қана жақсы себептермен ғана кездесуге жазсын!
Сіздерге тек сәттілік тілейміз!