«Білім керуені» жобасының «STEM туралы үздік эссе» байқауының жеңімпаздарымен интервью айдары, қонағымыз – Жамиева Кулшат
-Кулшат Жамиева, өзіңізді таныстырып кетсеңіз:
-Сәлеметсіз бе, мен Еуразия Ұлттық Университеті, Филология факультетінің 2-ші курс студентімін. Қазіргі таңда, шет тілі мұғалімдерін даярлау мамандығы бойынша білім алып жатырмын.
-Сіздің қандай қызығушылықтарыңыз бар?
-Негізінен қызығушылықтарым өте көп. Жан-жақты болуға тырысамын. Өзімді би саласында, музыка саласында, тіпті, мектеп табалдырығында жоғарғы сыныптарда оқып жүргенімде баскетбол үйірмесіне қатысқанмын. Қазір бос кездерімде сурет салып, кітап оқығанды ұнатамын.
-Болашақ мамандығыңыз бойынша қандай тағы да ізденістерді қолға алып жатырсыз?
-Дәл қазір болашақ мамандығым бойынша алдыға қойған мақсатым – шет тілін жоғары деңгейде меңгеру. Дегенмен басқа тұрғыда ізденісімді тоқтатпас үшін шетел компанияларында тәжірибеден өтудемін.
-Өзіңіздің қандай арманыңыз бар? Бізбен бөліссеңіз.
-«Армансыз адам – қанатсыз құспен тең» - дейді ғой. Ең басты арманым – елімізге, қоғамға пайдасын тигізетін тұлға болу. Әрі бұл арманымды өзімнің борышым деп есептеймін. Осы арманым мақсатқа айналу үшін тынымсыз еңбек етіп, тырысатын боламын.
-Өзіңізді осы байқауға қатысқанда, педагогог рөлінде болғанда, қандай сезімге бөлендіңіз? Қандай жаңалыққа тап болдыңыз? Өзіңізге қандай ойлар келді? Не түйдіңіз?
-Болашақ мамандығым мұғалім болғандықтан, әрине, білім саласы мені толғандырады. Осы ретте, эссе арқылы өз ойымды ашық жеткізуге мүмкіндік туғаны үшін қуаныштымын. Байқаудан түйгенім – болашақ білімді елдің қолында. Егерде еліміз дамыған державалардың қатарында болуын қаласақ, білім сапасына мұқият көңіл бөлгеніміз жөн.
-Педагог болу Сіз үшін қалай боп көрінді? Қандай сезімді бастан кештіңіз?
-Педагогика - ежелден маңызды сала болып есептеледі. Ерте заманнан бері ұстаздың рөлі - ерекше, әрі бағалы. Себебі, бүгін ұстаз болашақ ұрпаққа қандай білім берсе, ертең сол ұрпақ елімізге жемісін беретін болады. Осыған байланысты осындай ұлы істің бір бөлшегі болу – мен үшін үлкен мәртебе.
-Егер педагог болатын болсаңыз, қандай әдістемелік шеберліктерді ұсынар едіңіз?
-Егерде мен педагог болатын болсам, білім саласында ең әуелі ұлттық сипатқа аса көңіл бөлетін едім. Қазіргі заманда болашақ ұрпақтың санасына патриоттық тәрбиені сіңіру маңызды.
-Қазіргі таңда білім беру жүйесінде қандай жаңалық енгізуші едіңіз?
-Қазіргі таңда білім беру жүйесіне STEM бағдарламасын енгізуін толықтай құптаймын. Себебі, жаһандану дәуірі цифрлы технологиялармен тығыз байланысты.
-Заман талабына сай педагог қандай болу керек?
-Заман талабына сай педагог, әлбетте, профессионалды тұрғыда жетілген, яғни, өз ісін жоғары деңгейде білетін, әрі, өте жауапты, заман талабына сай цифрлы технологиялардан, жаңа педагогикалық әдістерден хабардар болуы керек. Жас буынды әрі қарай алдыға жетелейтін, білім нәрімен сусындыратын болғандықтан, педагогтың тұлғалық жағынан жіті дамығаны қажет. Сонымен қатар, ұқыпты, әдеп нормаларын бұзбайтын, мінезі жағынан мәнерлі, салмақты болуы тиіс.
-Егер де келесі рет осындай байқауларға қатысып жатсаңыз, басқа конкурсанттарға қандай ақыл-кеңес берер едіңіз?
-Бұл байқау көңілімнен шықты, әрі, аталмыш байқаудан көптеген пайдалы тәжірибе жинап, байқау барысында ерекше әсер алдым. Өзге конкурсанттарға беретін ақыл-кеңесім: өз ісіне тиянақты болып, бар назарын қойған мақсаттарына жұмылдыратын болса, жеңіске жетеді дегім келеді.
-Аталмыш жобаның келешік өміріне қандай ұсыныстар жасап, кеңес бере аласыз? Мүмкін жақсы идеяларыңыз бар шығар? Өз жаныңыздан қандай тілек айта аласыз?
-«Білім керуені» жобасынының ұйымдастырған байқаулары өте жоғары деңгейде өтті деп айтқым келеді. Жоба мүшелері өз істерінің шеберлері және байқауға қатысқан уақытта сыпайылық білдіріп, түсініксіз тұстарда қол ұшын беруге әзір болды. Осы қалыптарыңыздан танбаңыздар! «Білім керуені» жобасына студенттерге осындай керемет мүмкіндік беріп отырғанына алғысым шексіз. Сіздерге алдағы уақытта шығармашылық табыс тілеймін!